0531_Maria Birjinaren Ikustaldia

Lorailaren 31

BEZPERAK

Agurra

V/.  Zatozkit lagun, ene Jainko.
R/.  Jauna, zatoz laster ni laguntzera.

V/.  Aintza Aitari eta Semeari,
        eta Espiritu Santuari.
        Lehen lez, orain eta beti,
        eta amaibako egunetan. Amen. Alleluia.

Goratzarrea

AGUR, AMA, ERRUKIZ BETEA

Agur, Ama, errukiz betea,
Jainkoaren grazizko lorea,
itxaropen ustelik gabea,
Ama pozez Jainkoak asea,
zu Maria!

Gizadian haurrik ederrena,
neskatxetan agurgarriena,
birjinetan garbiz garbiena,
ta gorago zeruan zaudena,
zu Maria!

Egin zaitu Jaunak miragarri;
hautu zaitu mirabetzat, Mari,
aukeratu andre zoragarri,
zeruko ta lurreko mirari,
zu Maria!

Nahi zaitugu dohatsu aitortu,
eginalez ezin dugu lortu,
esan, jardun, hitzetan agortu,
Zu goratzen geldi gera mutu,
oi Maria!

Zakigu, Ama, bizian atsegin,
gauden beti pozetan zurekin,
atzerritik irtetearekin
bil zeruan gu aingeruekin,
oi Maria!

 
Salmoak

1 Ant. Maria Zakariasenean sartu zan eta Isabeli agur egin eutson. (Alleluia).

Sal 121

Ha bai poza nirea, esan eustenean:
      «Bagoaz Jaunaren etxera».
      Oraintxe heldu dira gure oinak,
      Jerusalem, zure atarira.

Jerusalen uri lez da jasoa.
      dan-dana batean batua.
      Leinuak, Jaunaren leinuak,
      bertara igoten dabe,
      Israelen lege danez
      Jaunaren izena ospatzera.
      Bertan dago ipinita auzi-mahaia,
      Davideneko mahaia.

Eskatu eizuez Jerusalementzat
      bakerako diranak:
      «Lasai bizi bitez
      Zu maite zaituenak.
      Izan bedi bake zure harresietan,
      lasaitasun zure jauregietan».

Nire anaien eta lagunen aldera,
      hauxe dinot: «bakea zurekin».
      Jaunaren, gure Jainkoaren, etxea
      maite dodalako,
      ondasunak opa ditut zuretzako.

 Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen. 

Ant. Maria Zakariasenean sartu zan eta Isabeli agur egin eutson. (Alleluia).

 
2 Ant.  Zure agurra nire belarrietara heldu orduko, seinak jauzi egin deust pozez sabelean. (Alleluia).

126  Salmoa

Etxea Jaunak ez bada jasoa,
      etxegileek alperrik dihardue.
      Jaunak zaintzen ez badau uria,
      uri-zainak alperrik dihardu.

Alperrik jatzue argitu barik jagitea,
      berandu ohean etzun
      eta neke-ogia jatea:
      Jaunak emoten deutse-ta ogia
      bere maiteei, lo dagozala!

Hain zuzen,
      Jainkoaren dohai dira seme-alabak,
      sari dira sabel seme-alabak.
      Gudari-eskuan gezia lez,
      gazte aroko semeak hala.

Dohatsu, gezi-ontzia
      hareekin bete daikena,
      ezin daiteke lotsatu etsaiekin
      atean auzitan diharduala.

Aintza Aitari eta Semeari
      eta Espiritu Santuari.
      Lehen lez orain eta beti
      eta amaibako egunetan. Amen. 

Ant. Zure agurra nire belarrietara heldu orduko, seinak jauzi egin deust pozez sabelean. (Alleluia).

 

3 Ant. Bedeinkatua zu, emakumeen artean, eta bedeinkatua zure sabeleko frutua. (Alleluia).

         Kantika Ef 1, 3-10

Bedeinkatua izan bedi Jainkoa,
      Jesu Kristo gure Jaunaren Aita,
      Espirituaren era guztietako
      bedeinkapenez,
      zeruan Kristogan
      bedeinkatu gaituana.

Harengan aukeratu ginduzan-eta,
      mundua sortu baino lehen,
      bere aurrean, maitasunez,
      santu eta errugabe izan gaitezan.

Aurrez aukeratu ginduzan
      bere seme-alaba-orde izateko,
      Jesu Kristoren bidez,
      bere nahiaren onberatasunez;
      bere Seme maiteagan
      hain ugari emon deuskun
      graziaren aintzak
      Bera gorespenez bete daian.

Seme honengan,
      bere odolaz dogu erospena,
      eta pekatuen parkamena;
      halakoa izan da
      Haren grazia-aberastasuna.
      Oparo isuri deusku-ta bere grazia
      ezaguera osoz eta jakituriaz:

bere nahiaren misterioa
      ezagutuazo deusku,
      bere onginahiez erabagita eukana,
      garaia etortean beteko ebana.
      Zeruko eta lurreko gauza guztiak
      Kristogan batuko dituala,
      Berau buru dala.

Aintza Aitari eta Semeari
      eta Espiritu Santuari.
      Lehen lez orain eta beti
     eta amaibako egunetan. Amen. 

Ant. Bedeinkatua zu, emakumeen artean, eta bedeinkatua zure sabeleko frutua. (Alleluia).
 

Jainkoaren hitza

1 Pe 5, 5b-7

      Izan zaiteze apalak guztiok alkarrekin, Jainkoak harroei gogor egiten deutse-ta; apalei, barriz, bere grazia emoten. Makurtu zaiteze Jainkoaren esku indartsuaren azpian, Berak jaso zaizen bere sasoian. Laga Haren gain zuen kezka guztiak, Bera da-ta zuen ardurea dauana.
 

Galderantzuna 

V/. Poztu zaitez, Maria, graziaz bete hori, * Jauna zurekin.
R/. Poztu zaitez, Maria, graziaz bete hori, * Jauna zurekin. 

V/. Bedeinkatua zu emakumeen artean, eta bedeinkatua zure sabeleko frutua.
R/. Jauna zurekin. 

V/. Aintza Aitari eta Semeari eta Espiritu Santuari.
R/. Poztu zaitez, Maria, graziaz bete hori, * Jauna zurekin.

Pazkoaldian

V/. Poztu zaitez, Maria, graziaz bete hori, Jauna zurekin. * Alleluia, alleluia.
R/. Poztu zaitez, Maria, graziaz bete hori, Jauna zurekin. *  Alleluia, alleluia. 

V/. Bedeinkatua zu emakumeen artean, eta bedeinkatua zure sabeleko frutua.
R/. Alleluia, alleluia. 

V/. Aintza Aitari eta Semeari eta Espiritu Santuari.
R/. Poztu zaitez, Maria, graziaz bete hori, Jauna zurekin. * Alleluia, alleluia. 

Magn. ant. Dohatsu deituko nabe gizaldi guztiek, Jainkoak mirabe honen ezereztasuna ikusi dau-ta. (Alleluia).

Lk 1, 46-55

Handiesten dau nire arimak Jauna,
   pozaren pozez daukat nire barrua;
   Jainkoa da-ta nire salbamena,
   ikusi dau-ta mirabe honen ezereztasuna.

Dohatsu deituko nabe gaurtik gizaldi guztiek,
   handiak egin deustaz-eta Ahalguztidunak:
   Santua da Haren izena,
   eta Haren errukia, gizaldiz-gizaldi †
   bildur deutsoenengana.

Bere besoaren indarra erabili dau,
   buru harroak triskatu dauz;
   bota dauz euren aulkitik handikiak,
   eta gora jaso dauz ezerezak;
   ondasunez bete dauz gosez egozanak
   eta esku hutsik bialdu asko eukenak.

 Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

Ant. Dohatsu deituko nabe gizaldi guztiek, Jainkoak mirabe honen ezereztasuna ikusi dau-ta. (Alleluia).

 

Eskariak

      Goretsi daigun Jainkoa, Aita ahalguztiduna; eta Maria, Haren Semearen ama, gizaldi guztiek goraltzea nahi izan dau-ta, egin deiogun otoitz, esanez:

Graziaz beteak egin bei otoitz gure alde.

      —Maria gure ama egin dozun Jauna, emon haren bitartez, gaixoei osasuna, nahigabetuei alaitasuna, pekatariei parkamena, * eta guztiei salbazinoa eta bakea ugari.

      —Zure Eleiza bihotz bat eta arima bat izan daitela maitasunean, * eta zure fededunek iraun daiela bat eginik otoitzean, Maria Jesusen amarekin.

      —Maria errukizko Ama egin dozun Jauna, * izan daigula haren laguntza arriskuetan aurkitzen garanean.

      —Mariari Jesusen eta Joseren etxean ama izateko eginkizuna eman zenion Jauna, * egizu, ama guztiak, Arek lagunduta, beren etxeetan maitasuna eta santutasuna geitzen aalegin daitezela.

      —Mariari erregina-koroia emon zeutsan Jauna, * egizu gure hildakoak beti izan daitezala zoriontsu zeruan santu guztien artean.

Gure Aita zeruetan zarana,
santu izan bedi zure izena,
etor bedi zure erreinua,
egin bedi zure nahia
zeruan bezela lurrean ere.
Emoiguzu gaur
egun honetako ogia,
parkatu gure zorrak
geuk ere geure zordunei
parkatzen deutsegun ezkero,
ez eiguzu itzi tentazinoan jausten
baina atara gagizuz gatxetik.

 
Otoitza

      Jainko ahalguztidun betikoa, Isabelengana joateko gogoa biztu zenduan   Maria Birjina dohatsuaren bihotzean, zure Semea bere sabelean eukala; egizu, Espirituaren deiari jarraitu deiogula, geuk ere Mariagaz batera Zure miragarriak goraldu daiguzan beti. Zure Seme Jesu Kristo gure Jaunaren bitartez, Zurekin eta Espiritu Santuarekin batean Jainko eta errege bizi da-eta gizaldi eta gizaldietan.

Amaierea

V/. Jauna zuekin.
R/. Eta zure Espirituarekin

V/. Bedeinkatu zaizela Jainko ahalguztidunak:
      Aitak eta Semeak eta Espiritu Santuak.
R/. Amen.

V/. Zoaze Jaunaren bakean.
R/. Eskerrak Jainkoari.